Suplementet me vitamina dhe minerale, përfshirë multivitaminat, nuk kanë të ngjarë t’ju mbrojnë nga kanceri, sëmundjet e zemrës ose vdekshmëria e përgjithshme, sipas Task Forcës së Shërbimeve Parandaluese të SHBA, në një udhëzim të ri të publikuar në revistën JAMA.
Që nga rekomandimi i fundit në vitin 2014, ky grup pune ka shqyrtuar 84 studime që përfshijnë rreth 700,000 njerëz, përfshirë 52 studime të reja mbi këtë temë.
Pavarësisht kësaj, përfundimi mbeti i njëjtë me atë të vitit 2014: Nëse jeni një e rritur e shëndetshme dhe jo shtatzënë, nuk ka “prova të mjaftueshme” që sugjerojnë se marrja e vitaminës E, vitaminës D, kalciumit, vitaminës A, beta karotenit, vitaminës B3, vitaminë B6, vitaminë C dhe selen përmirëson jetëgjatësinë.
Për më tepër, ekzistojnë prova të mjaftueshme për të mos rekomanduar përdorimin e suplementeve të beta-karotenit, të cilin trupi e konverton në vitaminë A, për të parandaluar sëmundjet kardiovaskulare ose kancerin, për shkak të rrezikut të mundshëm të rritjes së vdekshmërisë, vdekshmërisë kardiovaskulare dhe kancerit të mushkërive. Gjithashtu, nuk rekomandohet marrja e vitaminës E, pasi nuk ka asnjë përfitim në uljen e vdekshmërisë, sëmundjeve kardiovaskulare apo kancerit.
Dr. Jeffrey Linder, shef i mjekësisë së brendshme të përgjithshme në Shkollën Feinberg të Universitetit Northwestern të Mjekësisë në Çikago, në një editorial shoqërues tha: “Këshillimi për një stil jetese të shëndetshëm për parandalimin e sëmundjeve kronike duhet të fokusohet në qasje të bazuara në prova, duke përfshirë dieta të balancuara me shumë fruta dhe perime dhe aktivitet fizik”.
Për shembull, dieta mesdhetare, e cila fokusohet në një dietë me bazë bimore, aktivitet fizik dhe angazhim social, mund të zvogëlojë rrezikun për kolesterol të lartë, demencë, humbje kujtese, depresion dhe kancer të gjirit, sipas studimeve të shumta.
Ushqimet mesdhetare gjithashtu janë lidhur me humbje peshe, kocka më të forta, një zemër më të shëndetshme dhe jetë më të gjatë.
Një tjetër qasje e bazuar në prova është dieta DASH, e cila qëndron për “qasjet dietike për të ndaluar hipertensionin”. Studimet tregojnë se kjo dietë redukton me sukses presionin e lartë të gjakut. Si dieta mesdhetare ashtu edhe ajo DASH shmangin ushqimet e përpunuara dhe fokusohen te frutat, perimet, fasulet, thjerrëzat, drithërat, arrat dhe farat.
Ekspertët theksojnë: “Në vend që të shpenzoni para, kohë dhe vëmendje në suplemente, do të ishte më mirë të përqendroheshin në aktivitete me rrezik më të ulët dhe përfitime më të larta, si ndjekja e një diete të shëndetshme, ushtrimet, mbajtja e një peshe të shëndetshme dhe shmangia e duhanit”.