Vendimi i Unionit Evropian të Transmetuesve (EBU) për të lejuar Izraelin të marrë pjesë në Festivalin Evropian të Këngës ka shkaktuar një reagim të menjëhershëm. Irlanda, Spanja dhe Holanda kanë njoftuar tërheqjen e tyre nga edicioni i ardhshëm, duke bojkotuar garën në shenjë proteste.
Këto vende kishin kërkuar më parë përjashtimin e Izraelit për shkak të situatës humanitare në Gaza dhe pretendimeve për parregullsi në procesin e votimit. Megjithatë, EBU vendosi të miratojë një set të ri rregullash për të mbrojtur integritetin e festivalit, duke lënë vend për pjesëmarrjen e Izraelit pa një votim të fshehtë të anëtarëve.
Transmetuesi holandez Avrotros deklaroi se “pjesëmarrja në rrethana të tilla është e papajtueshme me vlerat publike që ne i konsiderojmë thelbësore”. Ndërkohë, televizioni spanjoll RTVE bëri me dije se ka vendosur të tërhiqet nga Eurovisioni dhe nuk do të transmetojë as finalen, as gjysmëfinalet, duke argumentuar se vendimi i EBU-së rrit mosbesimin ndaj organizimit dhe reflekton presione politike.
Sipas raportimeve, edhe disa transmetues të tjerë, përfshirë Slloveninë dhe Islandën, po shqyrtojnë tërheqjen e tyre, duke rritur tensionin rreth edicionit të ardhshëm të festivalit.