Aktivistja Evi Kokalari nëpërmjet një reagimi të bërë në rrjet së fundmi ka zbuluar se njerëzit e angazhuar pranë kryedemokratit Sali Berisha, po tentojnë të heqin “non-gratën” e tij në SHBA.
Sipas Kokalarit, këshilltarë të njohur që të lobojnë pro Berishës po paguhen me para korrupsioni.
“Që zgjedhjet i fiton Rama këtu s’ka dyshim, por beteja ime është që mos t’i heqin non-gratën Berishës. Fatkeqësisht, këta me paranë e korrupsionit po paguajnë këshilltarë që kanë njohje dhe pse duket se po lobojnë pa u rregjistruar me FARA. Lufta është vështirësuar por nuk është e pamundur për t’u fituar”, shkruan Evi Kokalari.
FARA, që aktivistja konservatore përmende në reagimin e saj është Akti i Regjistrimit të Agjentëve të Huaj, një ligj i Shteteve të Bashkuara që imponon detyrime për zbulimin publik ndaj personave që përfaqësojnë interesa të huaja.
Evi Kokalari i referohet dhe prezencës së ish-lobistit, konsulentit politik dhe avokatit amerikan Paul Manafort, në mitingun hapës të fushatës së Partisë Demokratike në Tiranë.
Kokalari sjell në kujtesë se Manafort u dënua me burg për komplot kundër Shteteve të Bashkuara dhe komplot për të penguar drejtësinë për përpjekje për të shantazhuar dëshmitarët.
“Skandali i hapjes së fushatës së Berishës, është pikërisht Paul Manafort, që e vunë në krye duke menduar se po s’ja përmendën emrin, do t’ju shpëtonte opinionit publik, ndërkohë në kulmin e hipokrizisë, flasin për McGonigal ‘amerikanin e Ramës’ kur ish-kriminelin e kanë të ulur ngjitur me Berishën. Paul Manafort u gjykua në një kohë që Trump ishte President, dhe Trump nuk e ndihmoi dot, sepse kur vjen puna tek drejtësia, asnjë nuk bën dot gjë. Me këta te dy, që Trump nuk i mori në Shtëpinë e Bardhë, Berisha mundohet të gënjejë opinionin shqiptar se ka mbështetjen e Donald Trump”, shkruan Evi Kokalari.