Ka ndërruar jetë në spitalin e Padovës një fëmijë 6-vjeçar, i cili të mërkurën pasdite ishte përplasur nga një makinë ndërsa po kalonte vijat e bardha me nënën e tij, në rrugën Noalese, në Santa Maria di Sala (Venezia).
I mituri, ashtu si edhe e ëma, ishte refugjat nga Ukraina, i shpëtuar nga lufta në vendin e tij më pak se një muaj më parë. Ata ishin strehuar së bashku me familje të tjera ukrainase në një ish-kanonikatë. Goditja e makinës e kishte hedhur vogëlushin disa metra larg dhe gjendja e tij u paraqit menjëherë shumë e rëndë.
Sipas Corriere del Veneto, fëmija kishte mbërritur nga Ukraina më 27 korrik, bashkë me nënën dhe vëllain e madh.
Në timonin e makinës që e përplasi ndodhej një 25-vjeçar, i cili u ndal menjëherë për të dhënë ndihmën e parë. Po sipas Corriere del Veneto, prokurori i Venecias, Stefano Strino, ka hapur një dosje hetimore dhe pritet ta regjistrojë 25-vjeçarin në listën e të dyshuarve. Ndërkohë, dinamika e aksidentit po hetohet nga karabinierët.