Një skenë prekëse ka ndodhur në Bazilikën e Shën Pjetrit, ku një murgeshë 81-vjeçare franceze theu protokollin zyrtar për t’i dhënë lamtumirën Papa Françeskut, mikut të saj të ngushtë prej katër dekadash.
Bëhet fjalë për murgeshën franceze, Genevieve Zaningros, e cila mbërriti në vendin e ceremonisë për t’u lutur, e shoqëruar nga një zyrtar i Vatikanit.
Daily Mail raporton se marrëdhënia shoqërore e tyre daton para shumë vitesh në Buenos Aires, ku Papa Françesku, atëherë Jorge Mario Bergoglio, shërbente si kryepeshkop.
Të bashkuar nga misioni i përbashkët për të ndihmuar më të përjashtuarit e shoqërisë, ata krijuan kështu një miqësi të pazakontë dhe të thellë. Zaningros kaloi më shumë se 56 vite në mbështetje të grave të margjinalizuara, veçanërisht atyre transgjinore.
Në videon e postuar në rrjet nga mediat e huaja shihet momenti kur ajo hyn në një zonë të ndaluar për laikët pranë arkivolit të Papa Françeskut.
Edhe pse vetëm kardinalët, peshkopët dhe priftërinjtë lejohen të afrohen në atë pjesë, askush nuk e ndaloi atë. Vërehet teksa qëndron në heshtje, e veshur me një shami blu, e mbytur në lot.
Murgesha në fjalë mësohet se jeton në një karvan së bashku me një tjetër murgeshë, Anna Amelia Giaketto, dhe çdo të mërkurë shoqëronte gratë e varfra dhe transgjinore në Vatikan, ku Papa i priste plot ngrohtësi dhe me një zemërgjerësi të madhe.