Policia e Korçës ka proceduar penalisht tre persona, pas publikimit dhe shpërndarjes në rrjete sociale të një videoje me përmbajtje të papërshtatshme, e cila ka qarkulluar së fundmi në telefona të qytetarëve të zonës.
Sipas njoftimit zyrtar, në video shfaqen dy shtetas të moshuar, një grua me inicialet I.R. dhe një burrë me inicialet M.G., të cilët dyshohet se kanë kryer veprime të turpshme në një hapësirë publike, konkretisht në zonën e Pazarit të Vjetër të qytetit.
Ngjarja është filmuar nga një e mitur, shtetasja 16-vjeçare me inicialet O.D., e cila më pas ka shpërndarë pamjet në rrjete sociale dhe platforma të komunikimit elektronik.
Për këtë arsye, ndaj të miturës është ngritur akuza për veprën penale të “pornografisë”, ndërsa dy të moshuarit po procedohen për “veprime të turpshme në publik”.
Policia bën thirrje për respektimin e normave të sjelljes në hapësira publike, si dhe për ndërgjegjësim në lidhje me përdorimin dhe shpërndarjen e përmbajtjes filmike që përfshin të dhëna apo sjellje të papërshtatshme.