Policia Kufitare e Kapshticës ka goditur një rast të futjes së mallrave kontrabandë në territorin shqiptar, duke sekuestruar sasi të konsiderueshme produktesh të ndaluara dhe duke vënë në pranga dy persona.
Kontrollet e shtuara në hyrje të Republikës së Shqipërisë, nga shërbimet e Drejtorisë Vendore për Kufirin dhe Migracionin Korçë, çuan në ndalimin e një automjeti të drejtuar nga shtetasi D. Ç., 37 vjeç, nga fshati Papër, Elbasan, dhe një autobusi me drejtues A. K., 58 vjeç, nga fshati Drenovë, Korçë.
Në automjetin e D. Ç. u gjetën të fshehura produkte ushqimore dhe produkte medicinale për bimët, të cilat ai tentonte t’i fuste në Shqipëri pa deklarim.
Në autobusin e A. K. u zbuluan, të fshehura në pjesën e brendshme të derës, ikona kulti, një sasi medikamentesh, dy aparate celularë dhe pajisje automjetesh, që po ashtu tentoheshin të futeshin kontrabandë.
Pas veprimeve procedurale, D. Ç. u arrestua për “Kontrabandë me mallra të licencuar” dhe “Kontrabandë me mallra të tjerë”, ndërsa A. K. për “Kontrabandë me mallra të tjerë”. Mallrat e sekuestruara dhe automjeti janë marrë në cilësinë e provës materiale.
Gjithashtu, policia ka proceduar penalisht tre shtetas të tjerë: E. Z., 30 vjeç, nga Korça; R. Ç., 35 vjeç, nga Pogradeci; dhe G. B., 35 vjeç, nga Elbasani, për veprën penale “Kalimi i paligjshëm i kufirit shtetëror”. Materialet i janë referuar Prokurorisë pranë Gjykatës së Shkallës së Parë Korçë për hetime të mëtejshme.