Altin Dumani, drejtuesi i SPAK, në një konferencë të zhvilluar sot në Universitetin “Aleksandër Moisiu” në Durrës, theksoi vendosmërinë e institucionit për të ndjekur penalisht çdo subjekt, pavarësisht fuqisë politike, pasurisë apo lidhjeve me botën e krimit.
“Pa drejtësi nuk ka paqe, dhe pa llogaridhënie nuk ka demokraci,” u shpreh Dumani, duke shtuar se ligji duhet të jetë i barabartë për të gjithë, pa përjashtime dhe pa privilegje.
Ai nënvizoi rëndësinë e Reformës në Drejtësi, të mbështetur nga partnerët ndërkombëtarë, si një instrument për çlirimin e sistemit nga ndikimet politike dhe korrupsioni.
“Shteti i së drejtës realizohet vetëm kur të gjithë kontribuojmë. SPAK dhe BKH janë krijuar pikërisht për të goditur korrupsionin dhe krimin e organizuar, dy plagët që pengojnë zhvillimin e vendit,” deklaroi kreu i Prokurorisë së Posaçme.
Në përfundim, Dumani u bëri thirrje të rinjve dhe studiuesve të drejtësisë që të ndihmojnë në ndërtimin e një sistemi të drejtë dhe të ndershëm: “Drejtësia e së nesërmes nis me formimin e brezit të ri të juristëve – me dije, etikë dhe guxim.”