Seanca paraprake në Gjykatën e Posaçme për kreun e Partisë Demokratike, Sali Berisha, në kuadër të dosjes “Partizani”, është shtyrë sërish.
Burime pranë gjykatës bëjnë me dije se në seancën e sotme nuk u mor asnjë vendim, ndonëse ishte parashikuar që gjykata të shprehej mbi kërkesën e SPAK për kalimin e çështjes për gjykim. Vendimi u shty dhe seanca e radhës është caktuar për të premten, më 18 prill, në orën 09:30.
Berisha është marrë i pandehur me akuzën e korrupsionit pasiv. Sipas SPAK, ai dyshohet se ka ndërmarrë veprime konkrete për miratimin e ligjeve dhe akteve nënligjore që favorizonin pesë familje pronare të truallit ku ndodhej kompleksi sportiv “Partizani”. Ndër përfituesit, sipas akuzës, ka qenë edhe dhëndri i tij, Jamarbër Malltezi.
Malltezi përballet me akuza për korrupsion pasiv dhe pastrim parash. Ai dyshohet se ka bashkëpunuar me Sali Berishën për të përfituar në mënyrë të paligjshme nga privatizimi i kompleksit, gjë që i ka sjellë familjes së tij përfitime të konsiderueshme financiare.