Deputetja dhe shkrimtarja Flutura Açka ka reaguar sërish ndaj kritikave të përsëritura të Marash Logut, këshilltar i Grupit Parlamentar të PD-së, pas promovimit të librit të saj në Kuvend.
Shkak për debatin u bënë fotografitë e Açkës me Taulant Ballën dhe Ermonela Felajn gjatë mbrëmjes së autografëve të librit “Para se të iki”. Logu i komentoi pamjet, ndërsa Açka u kundërpërgjigj se dy kundërshtarët politikë kishin ardhur për të respektuar librin, gjë që, sipas saj, duhet të kishte nxitur përgëzime, jo sulme.
“Madje, ata erdhën të respektojnë një libër që denoncon pushtetin e tyre, një gjë që e çmoj tej mase. Një gjë që duhet të shtynte ty ta promovoje librin, jo të kufizoje autoren, me të cilën je në betejë të përbashkët”, – shkruan Açka.
Deputetja theksoi se në promovim ishin të pranishëm edhe kolegë opozitarë si Bujar Leskaj, Merita Bakiu, Ervin Salianji, Kreshnik Çollaku, Emilia Koliqi, Selaudin Jakupllari dhe Andia Ulliri.
Duke e konsideruar “lektisje personale” sulmin e Logut, Açka thekson se fakti që ai është këshilltar i Grupit Parlamentar e bën atë të lexohet si sulm institucional ndaj një deputeteje të PD-së.
Ajo e mbylli reagimin me një mesazh të drejtpërdrejtë:
“Jeta është shumë e gjatë për ligësira. Harxhoje për një vete të bukur! Në mos ia dal të shkoj te letërsia, do të shkoj me nder, jo kërpudhë nën ferrë”.
Përplasja mes tyre ka nisur më herët, kur Marash Logu ka dalë në mbrojtje të Gazment Bardhit, të cilin Açka e akuzon për përçarjen e demokratëve duke lëvizur mes besnikërisë ndaj Lulzim Bashës dhe Sali Berishës.