Ovidio Guzman, një nga djemtë e famëkeqit Joaquin “El Chapo” Guzman dhe një nga drejtuesit e fraksioneve më të fuqishme të kartelit Sinaloa, ka pranuar të deklarohet fajtor përpara drejtësisë amerikane, duke shmangur kështu zhvillimin e një gjyqi të plotë.
Marrëveshja u bë publike nga gjykata e distriktit të Nju Jorkut, e cila njoftoi se do të heqë dorë nga akuzat ndaj tij për trafik droge, komplot kriminal dhe pastrim parash. Rasti i 35-vjeçarit tashmë është transferuar në gjykatën federale të Çikagos, ku më 9 korrik do të zhvillohet një seancë zyrtare për pranimin e fajësisë, nën drejtimin e gjyqtares Sharon Johnson Coleman. Data e dënimit ende nuk është caktuar.
Ovidio Guzman, i njohur edhe si një nga “Los Chapitos” – katër djemtë e El Chapos që morën frenat e kartelit pas arrestimit dhe dënimit të babait të tyre me burgim të përjetshëm në vitin 2019 – ishte ekstraduar nga Meksika në Shtetet e Bashkuara në shtator të vitit të kaluar.
Departamenti amerikan i Drejtësisë e akuzon atë dhe vëllezërit e tij si drejtues të fraksionit më brutal të kartelit, përgjegjës për shpërndarjen masive të fentanilit – një opium sintetik jashtëzakonisht vdekjeprurës, i cili shkakton mijëra viktima çdo vit në SHBA.
Trazirat brenda kartelit: Luftë e heshtur për pushtet
Dorëzimi i Ovidios nuk është goditja e vetme që ka përjetuar karteli vitet e fundit. Një tjetër nga djemtë e El Chapos, Joaquin Guzman Lopez, u arrestua në Teksas në korrik 2024, së bashku me një figurë historike të organizatës, bashkëthemeluesin Ismael “El Mayo” Zambada.
Burime pranë hetimit tregojnë se “El Mayo” e ka akuzuar djalin e El Chapos për tradhti, duke shkaktuar një konflikt të brendshëm të pashpallur, por të ashpër, që rrezikon të përçajë më tej fraksionet e kartelit.
Shtetet e Bashkuara, përmes një vendimi të administratës Trump më herët këtë vit, kanë përfshirë zyrtarisht kartelin Sinaloa në listën e “organizatave të huaja terroriste”.