Jared Kushner, dhëndri i ish-presidentit amerikan Donald Trump dhe drejtues i fondit investues “Affinity Partners”, ka vlerësuar klimën e re ekonomike në Shqipëri dhe lidershipin e kryeministrit Edi Rama, gjatë një lidhjeje direkte në Samitin Ekonomik Ndërkombëtar që po mbahet në Tiranë.
Kushner e përshkroi Ramën si një politikan të aftë dhe një lider krijues:
“Edi është një lider i zgjuar. Na tregoi se çfarë mund të bëjë një artist me një vend,” tha ai.
Resort luksoz në Sazan: “Do ndërtojmë diçka spektakolare”
Në fjalën e tij, Kushner konfirmoi planet për të ndërtuar një resort luksoz në ishullin e Sazanit, duke theksuar se studimet treguan potencial të jashtëzakonshëm për zhvillim:
“Kaluan më shumë se 12 muaj studim tregu dhe analizë demografike. Shqipëria doli si një destinacion unik dhe me potencial të jashtëzakonshëm për zhvillim turistik,” u shpreh ai.
Ai shtoi se resorti do të jetë vetëm disa minuta nga aeroporti i ri në Vlorë dhe shumë pranë Italisë, çka e bën vendndodhjen perfekte për turistët ndërkombëtarë.
“Do të ndërtojmë një komunitet të shkëlqyer, do të tërheqim markat më prestigjioze në botë. Unë dhe gruaja ime do jemi vizitorët e parë,” tha Kushner, duke lënë të kuptohet se projekti do të jetë edhe një simbol i marrëdhënieve miqësore mes Shqipërisë dhe Shteteve të Bashkuara.