Gjykata e Trevisos ka dënuar me burgim të përjetshëm Bujar Fandajn, 40-vjeçarin me origjinë nga Kosova, i cili vrau me thikë ish-partneren e tij, Vanessa Ballan, 26 vjeç, në dhjetor të vitit 2023. Viktima, nënë e një fëmije 5-vjeçar dhe shtatzënë në atë kohë, u gjet e pajetë në banesën e saj në Riese Pio X, me plagë të shumta të shkaktuara nga thika.
Fandaj kishte hyrë me forcë në shtëpinë e saj dhe e kishte sulmuar brutalisht, pasi ajo e kishte përfunduar lidhjen e tyre gjatë verës së po atij viti. Pas krimit, ai tentoi të arratisej, por u arrestua nga karabinierët pak orë më vonë, në banesën e tij.
Vendimi i gjykatës u dha pas një seance dy-orëshe dhe shkaktoi emocione të forta në sallën e gjyqit. Prindërit e Vanessës shpërthyen në lot, duke thënë: “Drejtësia u vu në vend, por qofshi të mallkuar!”. Fandaj ishte i pranishëm në shpalljen e vendimit dhe u dërgua menjëherë në burg për të vuajtur dënimin.