Ekspertët paralajmërojnë se demenca nuk prek vetëm të moshuarit. Një formë e saj, e njohur si demenca me fillim të hershëm, mund të shfaqet që në të 30-at, duke sjellë simptoma të pazakonta që shpesh shpërfillen – si vështirësi në të folur dhe çrregullime vizuale, më shumë sesa humbje kujtese.
Sipas Molly Murray, eksperte nga Universiteti i Uest Skocisë, një e treta e pacientëve me Alzheimer të hershëm shfaqin fillimisht probleme me shikimin dhe koordinimin – për shembull, vështirësi në lexim ose veshje – edhe pse nuk kanë dëmtime të syve. Problemi qëndron në përpunimin vizual të informacionit nga truri.
Gjithashtu, shfaqen vështirësi në gjuhë, si përdorimi i gabuar i fjalëve ose ndalesa të gjata gjatë të folurit. Ndryshimet e sjelljes, përfshirë humbjen e “filtërit” shoqëror, janë një tjetër sinjal që mund të ngatërrohet me çrregullime të tjera si depresioni apo menopauza.
Një formë tjetër, demenca frontotemporale (FTD), është veçanërisht e zakonshme tek të rinjtë dhe ndikon kryesisht në sjellje dhe të folur. Ajo përfaqëson rreth 40% të të gjitha rasteve të demencës me fillim të hershëm.
Sipas të dhënave të fundit, rreth 71,000 persona në Britani jetojnë me demencë me fillim të hershëm, një rritje me 69% që nga viti 2014. Ekspertët dyshojnë se faktorë si obeziteti, ushqyerja jo e shëndetshme dhe ndërgjegjësimi më i madh për sëmundjen po ndikojnë në këtë rritje.
Rastet publike si ato të Fiona Phillips, Sir Terry Pratchett dhe Robin Williams kanë ndihmuar në ngritjen e vetëdijes për këtë sëmundje të rrallë, por shpesh shkatërruese. Pratchett vuante nga një formë e quajtur atrofia kortikale posteriore, që ndikon tek përpunimi vizual, ndërsa Williams vuante nga demenca me trupa të Lewy-t, që shoqërohet me halucinacione dhe çrregullime të rënda mendore.
Ekspertët kërkojnë më shumë vetëdijësim mes publikut dhe mjekëve për ta kapur sëmundjen më herët. Edhe pse nuk ka shërim, një diagnozë e hershme mund të ndihmojë në lehtësimin e simptomave dhe ngadalësimin e përparimit të saj.