Në cilësinë edhe të drejtuesit politik të qarkut të Lezhës, Ministri i Mbrojtjes Ermal Nufi ka reaguar në lidhje me debatin e krijuar së fundmi lidhur me raportin e ekspertëve për reformën administrativo-territoriale. Në një reagim publik, ministri Nufi thekson se dokumenti nuk parashikon në asnjë moment shkrirjen apo bashkimin e Bashkisë Mirditë me ndonjë bashki tjetër.
“Jo vetëm si drejtues politik i Qarkut Lezhë, por edhe si një njeri me rrënjë të forta dhe krenare në Mirditë, e cila ka qenë dhe do të mbetet gjithmonë një nga krahinat më përfaqësuese të identitetit kombëtar shqiptar – DY FJALË SHKURT mbi debatin rreth raportit të ekspertëve për reformën administrative-territoriale” shkruan ministri Nufi.
Sipas tij, raporti i ekspertëve nuk përmban asnjë propozim për ndryshimin e statusit të Bashkisë Mirditë, ndaj nuk ka arsye që qytetarët të shqetësohen nga interpretime që nuk burojnë nga përmbajtja e dokumentit.
“E PARA: në asnjë moment, ky raport nuk propozon shkrirjen apo bashkimin e Bashkisë Mirditë me asnjë bashki tjetër. Prandaj, nuk ka asnjë arsye që mirditorët të shqetësohen nga interpretime që nuk burojnë nga përmbajtja e dokumentit. E DYTA: Për Mirditën, çështja nuk është të ndalemi nëpër debate mbi skenarë që raporti nuk i parashtron. Ajo që ka rëndësi është të përqendrojmë energjitë te zhvillimi i ekonomisë lokale, përmirësimi i shërbimeve publike dhe krijimi i më shumë mundësive për të ardhmen e këtij komuniteti me vlera të jashtëzakonshme njerëzore, historike dhe kulturore” sqaron ministri Nufi.
Më tej ai shprehet se, “askush nuk fiton duke mohuar realitetin! Mirdita, ashtu si shumë zona të tjera të vendit, përballet me sfida, ekonomike dhe zhvillimore, të cilat njihen prej vitesh”. Por, thekson ministri Nufi më tej, pikërisht për këtë arsye na duhet më shumë përgjegjësi. Na duhen më shumë fokus dhe energji se si ta bëjmë atë më të fortë ekonomikisht, më tërheqëse për të rinjtë, me më shumë investime, me shërbime publike më cilësore dhe me më shumë mundësi zhvillimi.