Një debat i ashpër verbal është zhvilluar në Zyrën Ovale mes Elon Musk dhe sekretarit amerikan të Thesarit, Scott Bessent, lidhur me politikën fiskale dhe autoritetin tatimor të SHBA-së.
Sipas dëshmitarëve okularë, përplasja ndodhi në prani të presidentit amerikan Donald Trump, i cili nuk ka reaguar drejtpërdrejt, por u raportua se ishte i pranishëm kur situata u tensionua.
Burime nga mediat amerikane theksojnë se debati arriti në atë pikë sa një punonjëse e stafit ndërhyri për të qetësuar situatën. “Ishin dy burra të moshës së mesme, miliarderë, që menduan se ishin në një arenë si ajo e serialit West Wing,” deklaroi një dëshmitar.
Edhe pse nuk pati konfrontim fizik, tensioni ishte i lartë. “Ishte me zë të lartë. Dhe dua të them, shumë i lartë,” shtoi një tjetër dëshmitar.
Sekretarja për shtyp e Shtëpisë së Bardhë, Karoline Leavitt, e komentoi ngjarjen si pjesë e një procesi të natyrshëm në qeverisje: “Presidenti Trump ka mbledhur një ekip me njerëz të pasionuar, që ndihen thellësisht të përkushtuar ndaj çështjeve që prekin vendin tonë. Mosmarrëveshje të tilla janë normale në çdo proces politik të shëndetshëm.”