Ambasada e SHBA-së në Tiranë ka shpërndarë në Instagram mesazhin e zëdhënëses së Departamentit të Shtetit, Tammy Bruce, lidhur me raportin e fundit për të drejtat e njeriut. Bruce theksoi se liria e shprehjes mbetet një përbërës themelor i një demokracie funksionale dhe është e kërcënuar në shumë vende të botës.
“Shoqëritë forcohen nga shprehja e lirë e mendimeve dhe censura qeveritare është e patolerueshme. Liria e shprehjes vazhdon të kërcënohet nga qeveritë që përdorin censurën, mbikëqyrjen arbitrare ose ligje kufizuese kundër zërave që nuk u pëlqejnë, shpesh mbi baza politike ose fetare. Pavarësisht se sa i papajtueshëm mund të jetë një fjalim, kriminalizimi ose heshtja me forcë krijon urrejtje, shtypje dhe polarizim,” deklaroi Bruce.
Sipas raportit të DASH, në Shqipëri presioni politik, korrupsioni dhe mungesa e fondeve kanë kufizuar pavarësinë e mediave të shkruara, duke detyruar gazetarët të ushtrojnë vetëcensurë. Disa prej tyre raportuan se kishin marrë kërcënime ose ishin sulmuar publikisht pas raportimeve mbi korrupsionin ose sjelljen e dyshuar të qeverisë.
Raporti citon edhe rastin e marsit, kur Unioni i Gazetarëve Shqiptarë denoncoi publikisht kryeministrin për përdorimin e gjuhës kërcënuese ndaj një gazetari që hetonte investimet në turizëm.
Sipas DASH, qeveria, partitë politike dhe grupet kriminale kanë përdorur lidhje të drejtpërdrejta me pronarët e mediave dhe redaktorët e lartë për të ndikuar në mbulimin e ngjarjeve. Qasja në informacionin publik ka vazhduar të jetë e vështirë për gazetarët, të cilët shpesh nuk marrin përgjigje në kohë nga institucionet.