Disa pamje të pazakonta po bëjnë xhiron e rrjetit. Një parashutist regjistroi veten e tij teksa binte në mes të disa reve të çuditshme në qiellin e Spanjës.
Djali në fjalë është identifikuar si Eric Finat Trepat, i cili u hodh nga avioni në lartësinë 4,500 metra mbi qytetin e Girona, në skajin lindor të Spanjës.
Eric tregon për rrjetin Storyful se ishte hedhja e parë e tij e ditës dhe rezultoi sipas tij “më impresionuese”.
Në video, Eric shihet që bie me shpejtësi mes reve të bardha, teksa shikuesit arrijnë të dallojnë shkumën e tyre apo pjesëzat e ujit, si dhe zbrazëtinë e ajrit me poshtë.
Parashutisti kalon mes reve, brendësia e të cilave është e errët, derisa më në fund zbret për të parë tokën.
Pamjet kanë qarkulluar gjerësisht në rrjetet sociale dhe shumë përdorues nuk kanë harruar të japin komentin e tyre.
Një prej tyre komentonte: “E kam bërë dhe unë këtë, është e dhimbshme. Mezi pret të shohësh tokën pasi në re ka copëza uji që të godasin trupin”.
Një tjetër përdorues tha: “Për fëmijët e shikojnë këtë, nuk duhet ta provoni sepse është e rrezikshme”.
Faktikisht, rregullat e parashutizmit ndalojnë hedhjen mes reve, kryesisht prej shikueshmërisë së ulët dhe tendencës për aksidente, përplasje apo humbje të kontrollit të parashutës.
Në rast të kalimit aksidental mes tyre rekomandohet që parashuta të hapet në zonë ku pamja është e qartë, shkruan rrjeti britanik Ladbible.
