Gjatë një konference të mbajtur këtë të martë, Instituti i Gjeoshkencave prezantoi rezultatet e studimit të tij më të fundit. Investimet janë përqendruar në shtimin e 20 stacioneve të reja për monitorimin e lëkundjeve sizmike.
“Që nga tërmeti i vitit 2019, me ndihmën e Agjencisë Kombëtare të Mbrojtjes Civile dhe UNDP-së, janë përmirësuar stacionet ekzistuese dhe janë shtuar 10 stacione të reja, duke rritur performancën dhe mbulimin e rrjetit sizmik në Shqipëri. Aktualisht, rrjeti sizmik shqiptar përfshin 10 stacione të reja dhe 10 të përmirësuara, të cilat përbëjnë bazën e këtij rrjeti.
Por cilat janë zonat ku janë vendosur stacionet e reja sizmike?
“10 stacionet e reja shtrihen nga veriu në jug, përfshirë Razmën, Burrelin, një shtesë në Durrës, zonën e Librazhdit, Belshin (një zonë me aktivitet sizmik të rëndësishëm), Pogradecin dhe Përmetin. Gjithashtu, janë ngritur dy stacione në Vlorë.”
Sipas shefes së Departamentit të Sizmiologjisë, Anila Xhahysa, jugu i Shqipërisë është zona më e prekur nga lëkundjet sizmike.
“Jugu është më i prekuri, bazuar në katalogun e përhapjes së sizmiocitetit dhe praninë e thyerjeve tektonike. Lëkundjet janë matur edhe nga sistemi GPS. Përveç përshpejtimit të truallit, dy parametra shumë të rëndësishëm janë kategoria e truallit (nëse është shkëmbor) dhe cilësia e ndërtesave,” shpjegoi ajo.