Pas më shumë se nëntë muajsh qëndrimi në burg, ish-deputeti i Partisë Demokratike, Ervin Salianji, është liruar me vendim me kusht nga Gjykata e Fierit. I veshur me kostum zyrtar, ai u paraqit menjëherë para mediave dhe bëri të ditur se do të rifillojë aktivitetin politik.
“Do të shkoj të falenderoj banorët e një fshati në Fier ku Partia Demokratike ka fituar. Ata treguan rezistencë, burrëri dhe besnikëri. Takimet me qytetarët do t’i nis që tani,” tha Salianji pas daljes nga burgu.
Edhe pse i ndalohet të ushtrojë funksione publike për pesë vitet e ardhshme, Salianji deklaroi se do të vijojë angazhimin në politikë dhe do ta çojë çështjen e tij në Gjykatën Evropiane për të Drejtat e Njeriut në Strasburg.
Duke reflektuar mbi kohën e kaluar pas hekurave, ai tha: “Burgu nuk i urohet as armikut. Sot kam një qëllim tjetër dhe e ndjej padrejtësinë më thellë se kurrë.”