Brooklyn Beckham dhe bashkëshortja e tij, Nicola Peltz, kanë thyer heshtjen lidhur me thashethemet e vazhdueshme për marrëdhënien e tensionuar me prindërit e Brooklyn, Victoria dhe David Beckham. Në një intervistë të re për revistën Glamour, çifti vendosi të flasë hapur për presionin që sjell vëmendja e vazhdueshme mediatike dhe si përballen me komentet e shumta rreth jetës së tyre private.
Thashethemet për një krisje në marrëdhëniet familjare u intensifikuan së fundmi, sidomos pasi çifti mungoi në festimet për 50-vjetorin e David Beckham, ndonëse ndodheshin në Britani në atë periudhë. Megjithatë, Brooklyn dhe Nicola tregohen të vendosur për të mos e lejuar zhurmën mediatike të ndikojë në jetën e tyre bashkëshortore.
“I injorojmë zhurmat. Mbajmë kokën ulur, punojmë shumë, jemi të sjellshëm dhe thjesht e shijojmë lumturinë tonë bashkë”, tha Brooklyn. Nga ana e saj, Nicola theksoi se nuk është gjithmonë e lehtë, por ka mësuar të mos merret me lajme të rreme që qarkullojnë në rrjet: “Instinkti im është t’i mohoj, por nuk ia vlen – thjesht shfletoj dhe ec përpara.”
Çifti, i cili u njoh për herë të parë në Coachella në vitin 2017 dhe u ribashkua në një festë të Halloween-it në 2019, u fejua pas vetëm gjashtë muajsh lidhje. Brooklyn theksoi se e kuptoi që në fillim se Nicola ishte gruaja e jetës së tij: “Pas tre muajsh e dija që doja të martohesha me të.”
Pavarësisht zërave për ndarje brenda familjes, dyshja tregon qartazi se janë të bashkuar dhe të sigurt në lidhjen e tyre.