Parlamenti i Britanisë së Madhe ka miratuar një projektligj të ri për kontrollin e duhanit dhe cigareve elektronike, duke ndërmarrë një hap të fortë drejt krijimit të një “brezi pa duhan”.
Sipas ligjit, të gjithë personat e lindur pas 1 janarit 2009 nuk do të kenë kurrë të drejtë të blejnë cigare, një masë që synon të reduktojë ndjeshëm përdorimin e duhanit në të ardhmen. Ky konsiderohet një nga ndryshimet më të rëndësishme në politikat e shëndetit publik në dekadat e fundit.
Përveç kësaj, qeveria do të ketë kompetenca më të gjera për të rregulluar produktet e nikotinës dhe vaping-ut, përfshirë kufizimin e shijeve dhe mënyrën e paketimit.
Ministrja e Shëndetësisë, Baroness Merron, u shpreh se kjo nismë pritet të shpëtojë jetë dhe të ulë ndjeshëm dëmet që shkakton duhani, i cili mbetet një nga shkaqet kryesore të vdekjeve të parandalueshme.
Ligji parashikon gjithashtu kufizime për përdorimin e cigareve elektronike në prani të fëmijëve, në kënde lojërash, pranë shkollave dhe spitaleve, ndërsa lejon përdorimin e tyre në ambiente private dhe disa hapësira të hapura.
Organizatat shëndetësore e kanë përshëndetur këtë vendim si një hap të rëndësishëm drejt përmirësimit të shëndetit publik, duke kërkuar njëkohësisht më shumë mbështetje për ata që duan të heqin dorë nga duhani.