Dy mjete lundruese u bllokuan sot nga Policia Kufitare në portin e Sarandës, pasi u konstatuan duke qarkulluar pa dokumentacionin e nevojshëm për aktivitet turistik.
Pas një postimi në rrjetet sociale që tregonte dy gomone me persona në bord pranë zonës së njohur turistike “Tre Ishujt” në Ksamil, shërbimet e policisë kufitare ndërhynë menjëherë në terren për të verifikuar situatën.
Gjatë kontrollit u konstatua se gomonia në pronësi të shtetasit E.M. dhe një motoskaf plastik në pronësi të R.L. po operonin pa certifikatën e operatorit turistik, duke shkelur rregullat për aktivitetin në ujërat bregdetare.
Për pasojë, të dy pronarët u gjobitën me nga 100,000 lekë secili dhe mjetet lundruese u bllokuan në mënyrë administrative nga Policia Kufitare e Portit Sarandë.
Drejtoria Vendore për Kufirin dhe Migracionin Vlorë njoftoi se kontrollet do të vijojnë përgjatë gjithë vijës bregdetare, për të siguruar zbatimin e ligjit dhe mbrojtjen e jetës së qytetarëve dhe turistëve në det.