Deputeti i Partisë Socialiste, Ardit Bido, deklaroi se mandarinat e Konispolit janë përballur me një sulm të orkestruar mediatik, i cili ka ulur çmimin për fermerët, ndonëse në tregjet e qyteteve ato shiten mbi 100 lekë për kilogram.
Sipas tij, sulmi vjen nga grosistë që synojnë të importojnë mandarina të huaja dhe organizojnë fushata negative kundër prodhimit vendas.
“Në asnjë rast nuk ka analizë që të vërtetojë praninë e pesticideve në mandarinat e Konispolit. Falënderoj Ministrinë e Bujqësisë për praninë dhe reagimin e saj javën e kaluar. Ky është momenti që të mbrojmë fermerët e zonës, të cilët punojnë gjatë gjithë vitit për këtë prodhim cilësor,” tha Bido.
Ai theksoi gjithashtu nevojën për masa që mbrojnë prodhimin vendas:
“Ndoshta ka ardhur çasti që të vendosim barriera doganore ndaj produkteve të subvencionuara nga jashtë, në mënyrë që produkti vendas të shitet drejtë dhe fermerët të mos dëmtohen.”
Deputeti u ndal edhe te situata e përmbytjeve në zonat e Sarandës, Delvinës dhe Konispolit, të cilat shkaktuan dëme në tokat bujqësore, shtëpi, blegtori dhe bletari.
“Pa dyshim, fermerët dhe bizneset e dëmtuara do të dëmshpërblehen,” përfundoi Bido.