Deputeti i Partisë Demokratike, Ferdinand Xhaferri, nuk kursen kritikat e ashpra ndaj udhëheqjes së dikurshme të PD dhe sidomos ndaj Sali Berishës, të cilit i konsideron fundin e karrierës politike që prej vitit 2013.
Në një analizë për “Top Story”, Xhaferri pranoi se gabimet themelore që çuan opozitën në humbjen e thellë ishin të shumta, duke përfshirë edhe mënyrën se si u ndërtuan koalicionet.
“E djathta u projektua rreth Berishës, një lider që i ka mbaruar koha politike dhe që vetë e pranoi këtë që në 2013. Kjo ishte një peshë që PD-ja nuk arriti ta heqë dhe në këto tre vite u tregua qartë se çfarë pasoja pati,” tha Xhaferri.
Ai theksoi se koalicioni u krijua me një pjesë që ishte ende e lidhur me problemet e Berishës, duke dështuar në përfshirjen e figurave të rëndësishme si Lapaj dhe Shehaj, si dhe duke mos respektuar proceset e brendshme të primareve, që sollën ndarje dhe tensione.
“Shtimi i presioneve të SPAK-ut, sanksionet amerikane dhe çështjet e vizave gjatë muajit të fushatës, shkaktuan rraskapitje dhe konfuzion në radhët tona,” përfundoi Xhaferri, duke pranuar hapur se këto faktorë vulosën humbjen.