Sali Berisha vijon t’i qëndrojë pranë Ilir Metës edhe pas humbjes së zgjedhjeve. Pas katër mandateve të sigurta që i dha në lista, tashmë “doktori” ka vendosur t’i japë edhe 3 deputetë hua për të ndihmuar Partinë e Lirisë të krijojë grupin parlamentar.
Lajmi u konfirmua për TCH nga Sekretari i Përgjithshëm i PL-së, Tedi Blushi, i cili theksoi se marrëveshja me demokratët synon që zëri i Ilir Metës të dëgjohet fuqishëm në Kuvend:
“Ne kemi rënë dakord që nëse nuk kalojmë pragun e 7 deputetëve, atëherë do marrim tre deputetë nga PD, në mënyrë që të jemi një zë i rëndësishëm në çdo seancë e çdo komision parlamentar”.
Çfarë përfiton PL?
Një grup parlamentar i jep bonus politik Partisë së Lirisë: më shumë minuta diskutimi në sallën e Kuvendit, zyrë dhe staf shtesë për punën parlamentare. Kjo do t’i shërbejë Metës, i cili pritet të koordinojë betejën politike të partisë së tij edhe nga burgu.
Nga ana e tij, Berisha vijon të lërë pezull rrugën që do të ndjekë Partia Demokratike në legjislaturën e re, ndërsa paralajmëron vendime të rëndësishme nga forumet e partisë.
Ndërkohë, edhe aleatët e tjerë të opozitës pritet të përfitojnë të njëjtin “model” si Meta: Mediu, Dule dhe Dukës pritet të marrin deputetë të transferuar nga PD, duke bërë që opozita në parlament të ketë të paktën tre grupe parlamentare.