Kreu i Partisë Demokratike, Sali Berisha, ka kërkuar ndjesë ndaj ambasadorit të Bashkimit Evropian në Tiranë, Silvio Gonzato, pas deklaratave të tij të mëparshme që u interpretuan si fyese. Nga jashtë Parlamentit, Berisha tha se nuk kishte pasur ndërmend të ofendonte dhe se komentet e tij ishin bazuar, sipas tij, në informacione të bëra publike më herët nga vetë diplomati.
“Nëse ai e konsideron fyerje, unë e rikonsideroj qëndrimin tim, i kërkoj të falur, por kjo nuk përbën fyerje,” u shpreh Berisha, duke theksuar se deklaratat e tij ishin një ripërsëritje e asaj që ambasadori kishte thënë vetë më parë.
Berisha është përballur sot me kritika për komentet e tij ndaj Gonzatos, edhe nga komisionerja Marta Kos, të cilat kanë nxitur reagime mbi gjuhën publike dhe etikën politike.