Presidenti Bajram Begaj ka dekretuar zhvillimin e zgjedhjeve të pjesshme më 9 nëntor 2025 në gjashtë bashki të vendit, përfshirë edhe Tiranën, vetëm pak ditë pas vendimit të qeverisë për shkarkimin e Erion Veliajt.
Vendimi vjen pas shpalljes së vakancës në kryeqytet, pasi Veliaj u shkarkua nga Këshilli i Ministrave me motivin e mosparaqitjes në detyrë për 3 muaj rresht. Vetë ish-kryebashkiaku i është drejtuar Gjykatës Kushtetuese për të kundërshtuar vendimin.
Në një reagim zyrtar, Presidenca sqaroi se Begaj ka verifikuar vetëm rregullshmërinë procedurale të ndjekur nga Këshilli Bashkiak dhe Këshilli i Ministrave, duke respektuar neutralitetin institucional dhe pa hyrë në meritat e çështjes.
Sipas Presidencës, ky rast juridikisht ndryshon nga shkarkimet sipas nenit 115 të Kushtetutës:
Shkarkimi për mungesë 3-mujore nuk i takon juridiksionit të Kushtetueses, por gjykatës administrative.
Ankimimi nuk pezullon automatikisht vendimin, përveç nëse ka një urdhër të posaçëm të gjykatës.
Deri në momentin e dekretimit, nuk ishte regjistruar asnjë ankim apo vendim pezullimi, ndaj Presidenti veproi brenda afatit ligjor 48-orësh për shpalljen e zgjedhjeve.
Përveç Tiranës, zgjedhjet e pjesshme do të mbahen edhe në Vlorë, Berat, Mat, Tepelenë dhe Cërrik.
Në fund të deklaratës, Begaj bëri thirrje për një fushatë të ndershme dhe pjesëmarrje të gjerë qytetare në votime.
Sqarimi i Presidencës:
“Këshilli i Ministrave ka referuar tek kuadri ligjor, i cili përcakton se shkarkimi për ‘mosparaqitje në detyrë për një periudhë 3-mujore të pandërprerë’ përbën rast të ndryshëm nga shkarkimi ‘për shkelje të rënda të Kushtetutës ose të ligjeve’ që parashikon neni 115 i Kushtetutës.”
Kjo nënkupton se vendimi i qeverisë përmes VKM nr. 539, datë 25.09.2025, nuk bie në juridiksionin e Gjykatës Kushtetuese, por në atë të gjykatës administrative.
Ndryshe nga rastet e parashikuara në nenin 115 të Kushtetutës, ku një ankim pezullon automatikisht vendimin e shkarkimit, në rastet e tjera – si ai i Veliajt – pezullimi i vendimit ndodh vetëm me urdhër të posaçëm të gjykatës administrative.
Presidenca shton se, deri në momentin e dekretimit të zgjedhjeve, nuk është regjistruar ndonjë ankimim pranë organeve kompetente gjyqësore dhe nuk ka një vendim pezullimi nga ana e tyre. Për rrjedhojë, Presidenti ka vepruar brenda afatit ligjor prej 48 orësh nga marrja e njoftimit për shpalljen e zgjedhjeve.
Krahas Tiranës, zgjedhjet e pjesshme më 9 nëntor do të mbahen edhe në bashkitë: Vlorë, Berat, Mat, Tepelenë dhe Cërrik.
Në fund të deklaratës, Presidenti Begaj ka bërë thirrje për një fushatë konkurruese dhe etike, në respekt të Kodit Zgjedhor, si dhe ka shprehur dëshirën që qytetarët të përfshihen gjerësisht dhe të marrin pjesë masivisht në procesin e votimit.