Shtetet e reja anëtare të Bashkimit Europian mund të vendosen në një periudhë prove për disa vite dhe të përjashtohen nga blloku në rast të shkeljes së standardeve demokratike, sipas një propozimi të Komisionit Europian. Ideja synon të shmangë rreziqet e përsëritjes së modelit të Hungarisë pas anëtarësimit në BE.
Shefja e Zgjerimit të BE-së, Marta Kos, paralajmëroi se nuk dëshiron të njihet si “komisionerja që solli kalin e Trojës” — duke nënkuptuar anëtarësime që mund të shkaktojnë probleme pas disa vitesh. Ajo sqaroi se komisioni po shqyrton mekanizma si periudha tranzitore, një lloj prove dhe masa mbrojtëse, për të garantuar respektimin e vlerave bazë si demokracia, liria e medias dhe pavarësia e gjyqësorit.
Raporti vjetor mbi përparimin e vendeve kandidate, përfshirë Ukrainën, Moldavinë dhe Malin e Zi, vlerëson se vendet kanë bërë progres në reformat e nevojshme, por kryeqytetet e BE-së mbeten të kujdesshme për pranimin e anëtarëve të rinj. Një pjesë e këtij hezitimi lidhet me përvojën me Viktor Orbánin dhe ndikimin e tij autoritar në Hungari.
Kos nënvizoi se vendet kandidate mund të përjashtohen nga Unioni në rast të shkeljeve të përsëritura dhe se traktatet e ardhshme të anëtarësimit do të përfshijnë garanci më të forta për sundimin e ligjit. Ajo hodhi poshtë idenë e një anëtarësimi me dy nivele, duke theksuar se reformat e brendshme janë thelbësore për të siguruar integrimin e plotë në BE.
Komisioni gjithashtu po punon për të rritur integrimin gradual të vendeve kandidate në programet e bllokut përpara anëtarësimit, duke përfshirë një “mburojë demokratike” që synon të mbrojë demokracinë në Europë.
Marta Kos paralajmëroi se nëse BE nuk ruan ritmin e zgjerimit, ekziston rreziku që Rusia të përfitojë nga vakumi strategjik, duke u futur nga “dera e pasme” e Evropës Lindore.