Bashkimi Evropian ka vendosur të shpërndajë 40 000 bileta udhëtimi “Interrail” për të rinjtë evropianë, në kuadër të 40-vjetorit të marrëveshjes së Shengenit, që hapi rrugën për një Evropë pa kufij.
Komisioni Evropian njofton se aplikimet janë të hapura deri më 13 nëntor, dhe mund të marrin pjesë të rinjtë e lindur në vitin 2007, të cilët duhet të plotësojnë një kuiz të shkurtër online për t’u kualifikuar.
“Dyzet vjet më parë, Shengen hapi dyert drejt një Evrope pa kufij. Sot e festojmë këtë liri duke u dhënë të rinjve mundësinë ta përjetojnë, të kalojnë kufijtë, të njohin njerëz të rinj dhe të zbulojnë pasurinë e Evropës sonë të përbashkët,” tha komisioneri i BE-së për Rininë, Glenn Micallef.
Fituesit e biletave do të mund të udhëtojnë falas për një periudhë deri në 30 ditë, në çdo vend të BE-së, nga 1 mars 2026 deri më 31 maj 2027.
Përveç udhëtimit falas me tren, pjesëmarrësit do të përfitojnë edhe zbritje në transport publik, akomodim, aktivitete kulturore, ushqim, sport dhe shërbime të tjera në të gjithë kontinentin.
Mbajtësit e biletave mund të zgjedhin itinerarin e tyre personal ose të ndjekin rrugët e sugjeruara nga Komisioni Evropian.