Zëvendëskryeministrja dhe Ministrja e Infrastrukturës dhe Energjisë, Belinda Balluku, gjatë një vizite zyrtare në Zvicër, deklaroi se në të ardhmen pritet të bëhet e mundur udhëtimi me tren nga Zvicra drejt Shqipërisë, në kuadër të përfshirjes së vendit në korridoret hekurudhore europiane.
Gjatë udhëtimit me tren nga Zyrihu në Bern, ku zhvilloi një takim bilateral me Ministrin Federal zviceran të Transportit, Energjisë dhe Mjedisit, Balluku vlerësoi përvojën e sistemit hekurudhor zviceran dhe mundësitë për bashkëpunim të ngushtë në zhvillimin e rrjetit hekurudhor shqiptar.
“Mirë do ishte që udhëtimin me tren ta bënim nga Zvicra në Shqipëri – dhe shumë shpejt do ta bëjmë këtë përmes korridoreve europiane, ku Shqipëria po bëhet pjesë, ashtu siç po ndodh edhe me rrjetin e autostradave,” deklaroi Balluku.
Ajo shtoi se bashkëpunimi me hekurudhën zvicerane do të fokusohet në rritjen e efikasitetit dhe standardeve të transportit hekurudhor në Shqipëri, duke filluar me projektin hekurudhor Tiranë–Durrës, që është faza e parë e modernizimit të infrastrukturës kombëtare të transportit.