Gjendja shëndetësore e Pano Ruçit, babait të Denis Ruçit — një prej viktimave të tragjedisë hekurudhore në Tempé të Greqisë — është përkeqësuar ndjeshëm, ndërsa ai ndodhet në ditën e 17-të të grevës së urisë. Kombëtar grek i Urgjencës (EKAV) ka njoftuar se Ruçi ka refuzuar t’i nënshtrohet ekzaminimeve mjekësore dhe analizave laboratorike, pavarësisht gjendjes së tij të rënduar.
Pano Ruçi po zhvillon grevën në sheshin “Sintagma” të Athinës, duke kërkuar zhvarrosjen e trupit të të birit, kërkesë që ai e konsideron të domosdoshme për zbardhjen e plotë të ngjarjes tragjike.
Mjekët që ndjekin rastin kanë paralajmëruar për rrezik serioz për shëndetin e tij dhe i kanë kërkuar autoriteteve të ndërhyjnë për të shmangur pasoja të parikuperueshme. Sipas tyre, pesha trupore e Ruçit është nën kufirin e pritshëm për një person në grevë urie për kaq ditë, ndërsa ai vuan edhe nga sëmundje kronike.
Pano Ruçi aktualisht përballet me hipotension ortostatik, hipoglicemi, dobësi kardiake dhe një sistem imunitar të dobët, çka e bën veçanërisht të ndjeshëm ndaj infeksioneve të menjëhershme.
EKAV njoftoi se, pas një pauze të shkurtër në një hotel mëngjesin e sotëm, ai është rikthyer në shesh për të vijuar protestën. Shërbimi Kombëtar i Urgjencës ka vendosur ekipe ambulancash dhe motoçikletash në gatishmëri të përhershme në zonën e Sintagmës, për të monitoruar shenjat jetësore të Ruçit në intervale të rregullta.
Megjithatë, deri më tani ai ka refuzuar çdo lloj kujdesi mjekësor dhe nuk ka pranuar të kryejë kontrolle laboratorike, duke e vështirësuar ndjeshëm ndërhyrjen e mundshme emergjente në rast përkeqësimi të menjëhershëm.