Mustafa Martinaj, babai i biznesmenit të shumëkërkuar Ervis Martinaj, ka depozituar në Gjykatën e Shkallës së Parë të Juridiksionit të Përgjithshëm në Lezhë një kërkesë për shpalljen zyrtare të të birit si person të zhdukur.
Sipas kërkesës së paraqitur në gjykatë, Mustafa Martinaj kërkon që Ervis Martinaj, i lindur më 6 tetor 1982 në Burrel dhe banues në Fushë-Kuqe, Patok, Kurbin, të shpallet zyrtarisht i zhdukur.
Ervis Martinaj rezulton i humbur që prej gushtit të vitit 2022, kur dyshohet se është parë për herë të fundit. Që nga ajo kohë, autoritetet shqiptare nuk kanë mundur të gjejnë asnjë gjurmë të tij, ndërsa rasti ka mbetur një nga dosjet më të përfolura në vend.
Kërkesa e familjes për shpalljen e tij si të zhdukur mund të hapë rrugën për procedura ligjore të mëtejshme që lidhen me statusin civil dhe pasurinë e tij.