Prokuroria e Gjirokastrës ka regjistruar procedim penal për veprën penale ‘Shkaktimi i vetëvrasjes’ lidhur me ngjarjen e rëndë, ku një 17-vjeçare i dha fund jetën pasi bullizohej nga shokët e klasës dhe mësuesit.
Nxënëse e vitit të parë në një prej gjimnazeve të qytetit të Gjirokastrës, adoleshentja evidentohej si një vajzë e qetë dhe me rezultate të mira në mësime. Ndërkohë që sipas mësuesve dhe nxënësve, ajo ditët e fundit kishte qenë e qetë.
Një ndër provat kryesore mbi të cilat po heton Prokuroria është një letër e shkruar nga gjimnazistja para se të merrte vendimin fatal. Prokuroria e Gjirokastrës do të marrë në pyetje edhe mësuesit dhe nxënësit e shkollës ku ajo mësonte, në lidhje me zbardhjen e shkaqeve që çuan në humbjen e jetës së 17-vjeçares.
“Prokuroria pranë Gjykatës së Shkallës së Parë të Juridiksionit të Përgjithshëm Gjirokastër ka regjistruar procedimin penal për veprën penale ‘Shkaktimi i vetëvrasjes’ parashikuar në nenin 99 të Kodit Penal.
Mbi bazën e materialeve të referuara nga Komisariati i Policisë Gjirokastër, Prokuroria pranë Gjykatës së Shkallës së Parë të Juridiksionit të Përgjithshëm, Gjirokastër ka regjistruar procedimin penal nr.70, të vitit 2025 në lidhje me ngjarjen e datës 10.02.2025, ku në banesën e saj në Gjirokastër u gjet e vdekur shtetasja e mitur I. M.
Në kuadër të këtij procedimi,është ngritur grupi hetimor, i cili po kryen me prioritet të gjitha veprimet e nevojshme me qëllim zbardhjen e plotë të kësaj çështjeje, duke nisur nga pyetja e personave që kanë dijeni për veprën penale”, njofton prokuroria e Gjirokastrës.
Çfarë ndodhi gjatë së hënës në Gjirokastër?
Irsa Muçollari, nxënëse e klasës së 10-të në gjimnazin “Siri Shapllo” të Gjirokastrës është gjetur pa shenja jete nga i ati dhe është transportuar për në spital. Ajo dyshohet se është vetëvarur në banesën e saj ndërsa mjekët e urgjencës vetëm kanë konfirmuar vdekjen.
Ngjarja ka ndodhur gjatë pasdites pasi ishte kthyer nga shkolla dhe sapo ka nisur një hetim për rrethanat.