SHBA u detyrua të dërgonte avionë luftarakë për të përgjuar katër avionë ushtarakë rusë që fluturonin pranë Alaskës, në kulmin e tensioneve me Moskën për shkak të luftës në Ukrainë.
Ngjarja ndodhi të mërkurën, sipas Komandës së Mbrojtjes Hapësinore të Amerikës së Veriut (NORAD). Katër avionët rusë – dy Tu-95 bombardues me rreze të gjatë veprimi dhe dy Su-35 – u zbuluan në Zonën e Identifikimit të Mbrojtjes Ajrore të Alaskës.
Për t’i identifikuar dhe monitoruar, NORAD mobilizoi një avion E-3 AWACS, katër F-16 dhe katër avionë furnizues me karburant KC-135.
Autoritetet amerikane thanë se avionët rusë qëndruan në hapësirë ajrore ndërkombëtare dhe nuk shkelën territorin sovran të SHBA apo Kanadasë. Megjithatë, kjo konsiderohet pjesë e një serie veprimesh ruse që synojnë testimin e gatishmërisë së forcave ajrore amerikane dhe aleatëve të NATO-s.
Sipas CBS News, aktiviteti i Moskës është cilësuar “rutinë”, por i mbetet një shenjë e tensioneve të rritura mes dy fuqive.
Ky episod pason incidente të ngjashme gjatë muajit gusht, kur avionë zbulues rusë u interceptuan disa herë mbi të njëjtën zonë.