Tre të rinj u arrestuan të hënën në Antverp, nën akuzën e planifikimit të një sulmi terrorist me frymëzim xhihadist që synonte kryeministrin belg Bart De Wever duke përdorur një dron, raporton shtypi belg.
Arrestimet u kryen si pjesë e një hetimi për tentativë vrasjeje terroriste dhe pjesëmarrje në veprimtari të një grupi terrorist, tha kreu i zyrës së prokurorit federal, Anne Franssen, gjatë një konference për shtyp në Bruksel.
“Disa prova tregojnë se qëllimi i tyre ishte të kryenin një sulm terrorist me frymëzim xhihadist kundër politikanëve. Dyshohet se kishin planifikuar të ndërrtonin një dron me lëndë shpërthyese,” shtoi ajo.
Policia kontrolloi një shtëpi disa qindra metra larg rezidencës së kryeministrit në Antverp, ku u gjet një pajisje shpërthyese e improvizuar, ende jo funksionale, si dhe një çantë shpine me topa metalikë. Në shtëpinë e një tjetri u zbulua një printer 3D, i cili dyshohet se do të përdorej për të prodhuar objekte që do të ndihmonin në kryerjen e sulmit.
Të dyshuarit janë të gjithë të rritur, lindur në vitet 2001, 2002 dhe 2007. Dy prej tyre dhanë deklarata në polici dhe do të paraqiten para një hetuesi nesër, ndërsa i treti u la i lirë pas marrjes në pyetje.