Në këtë merkato të nxehtë vere, Kristjan Asllani ka zgjedhur destinacionin e tij të ri: Torinon.
Mesfushori shqiptar u transferua nga Interi me formulën e huazimit prej 1.5 milionë eurosh, ndërsa “Granata” ruan opsionin për ta blerë përfundimisht kartonin e tij për 12 milionë euro.
Vendimi për t’u bashkuar me Torinon erdhi pas refuzimit të disa ofertave të tjera, përfshirë edhe atë të Bolonjës. Këmbëngulja e vetë Asllanit luajti rol kyç në këtë zgjedhje.
“Jam i lumtur që jam këtu, kam ndjenja pozitive dhe mezi pres të filloj,” tha lojtari për Sky Sport, menjëherë pas vizitave mjekësore dhe në prag të firmës me klubin e ri.
Ironia e fatit e bën debutimin e tij të parë edhe më të veçantë: Torino do të përballet me Interin, ish-klubin e tij, duke e kthyer këtë ndeshje në një provë emocionale dhe sportive për 22-vjeçarin shqiptar.