Gazetari Blendi Fevziu, në hapje të emisionit Opinion në TV Klan, dha një njoftim të rëndësishëm dhe emocional, duke përgënjeshtruar lajmet që qarkulluan gjatë ditës për ndarjen nga jeta të ish-kreut të Kadastrës, Artan Lame.
Sipas Fevziut, Lame ndodhet në koma cerebrale pas një ndërhyrjeje të rëndë në zemër dhe ndonëse në gjendje shumë të rëndë shëndetësore, ai është ende gjallë.
“Ky është një nga anonçimet më të vështira në jetën time. Artan Lame, një mik i imi personal dhe një njeri që e ka dashur Shqipërinë dhe historinë e saj, ndodhet në një gjendje kritike, në koma cerebrale. Pas një problemi disajavor në zemër, ai iu nënshtrua një operacioni të rëndë, nga i cili nuk është zgjuar më. Mjekët e konsiderojnë gjendjen shumë të rëndë, por ai është ende në jetë,” u shpreh Fevziu, duke theksuar se ky sqarim vjen me kërkesë të familjes së Lames, për të mos u përhapur informacione të pasakta.
Më herët gjatë ditës, në disa media dhe rrjete sociale u përhap lajmi se Artan Lame kishte ndërruar jetë në një spital në Mynih të Gjermanisë, ku ndodhej për trajtim pas një ishemie cerebrale. Fevziu theksoi se kjo nuk është e vërtetë dhe bëri thirrje për ndjeshmëri dhe kujdes në raportimin e rasteve të tilla.