Biznesmeni Gazmend Haxhia, pronar i kompanisë ‘Landways International’, u arrestua nga policia në aeroportin e Rinasit sapo zbriti nga avioni. Haxhia është akuzuar nga Prokuroria e Posaçme (SPAK) si bashkëpunëtor i ish-ministrit Ilir Beqaj në çështjen e shpërdorimit të fondeve të Bashkimit Evropian. Gjykata kishte lëshuar një urdhër arresti në mungesë për të, duke vendosur masën e arrestit shtëpiak.
SPAK dyshon se Beqaj, në rolin e tij si drejtues i SASPAC, ka abuzuar me të paktën tetë procedura prokurimi të menaxhuara nga agjencia për fondet e BE-së.
Sipas SPAK, SASPAC i ka dhënë kompanisë së Haxhias 125 mijë euro për organizimin e një konference turizmi të quajtur “Festa”. Për të njëjtin aktivitet, Ministria e Turizmit ka paguar 38.5 milionë lekë. Nga mbi 500 mijë euro të tenderuara, 4.2 milionë lekë janë shpenzuar për një darkë te “Gzona”.