Policia e Lezhës ka arrestuar në flagrancë një 57-vjeçar, i dyshuar si autor i zjarrit që përfshiu malin e Shëngjinit, duke shkaktuar dëme të konsiderueshme në sipërfaqen pyjore.
Sipas hetimeve paraprake, ngjarja ka ndodhur më 3 korrik 2026 në vendin e quajtur “Sagë”, ku shtetasi B. A., pranë subjektit të tij tregtar, dyshohet se ka ndezur zjarr për djegien e mbeturinave. Flakët kanë dalë jashtë kontrollit dhe janë përhapur me shpejtësi, duke djegur një sipërfaqe të madhe pylli në malin e Shëngjinit.
Gjatë përhapjes së zjarrit, në zonë ka ndodhur edhe një shpërthim, i dyshuar si pasojë e detonimit të një predhe luftarake të pashpërthyer. Si rezultat është lënduar lehtë shtetasi A. U., 30 vjeç, i cili ndodhej si pasagjer në një automjet që kalonte në atë zonë. Ai mori ndihmën mjekësore dhe ndodhet jashtë rrezikut për jetën.
Hetimet zbuluan gjithashtu se i dyshuari kishte hequr pajisjen DVR të kamerave të sigurisë së subjektit të tij, me dyshimin se synonte të pengonte zbardhjen e plotë të ngjarjes.
Në përfundim të veprimeve procedurale, 57-vjeçari u arrestua për veprat penale “Shkatërrimi i pronës nga pakujdesia”, “Veprime që pengojnë zbulimin e së vërtetës”, “Shkatërrimi nga pakujdesia me zjarr i pyjeve dhe mjedisit pyjor” dhe “Plagosje e lehtë nga pakujdesia”.
Policia e Lezhës u bën apel qytetarëve të tregojnë kujdes maksimal gjatë kësaj periudhe dhe të shmangin çdo veprim që mund të shkaktojë zjarr. Autoritetet ftojnë gjithashtu qytetarët të denoncojnë çdo rast të paligjshmërisë në numrin 112, duke garantuar anonimat dhe reagim të menjëhershëm.