Një ngjarje e rëndë ka vënë në lëvizje të gjithë autoritetet greke. Një i burgosur shqiptar, vetëm 28 vjeç, ka arritur të arratiset nga spitali i burgut në Kostur, duke i shpëtuar mbikëqyrjes së rojeve në rrethana ende të paqarta.
Mësohet se i riu ndodhej në klinikën kirurgjikale të Spitalit të Përgjithshëm, ku po trajtohej nën vëzhgim dhe me masa sigurie, por për arsye që po hetohen ai ka mundur të largohet pa lënë gjurmë.
Prokuroria është informuar menjëherë dhe pritet që brenda orëve të bëjë publike identitetin dhe fotografinë e 28-vjeçarit, në mënyrë që qytetarët të ndihmojnë në gjetjen e tij.
Policia greke ka nisur një operacion të gjerë kërkimi në gjithë zonën e Kosturit dhe në periferi, ndërsa janë përforcuar edhe patrullat policore e ushtarake përgjatë kufirit me Shqipërinë, për të shmangur mundësinë që i arratisuri të ketë tentuar kalimin drejt territorit shqiptar.
Ngjarja ka shkaktuar shqetësim të madh tek komuniteti vendas, ndërsa hetimet janë përqendruar jo vetëm tek mënyra se si u arratis shqiptari, por edhe tek përgjegjësia e rojeve që duhej ta mbanin të sigurt. Ende nuk dihet nëse autoritetet shqiptare janë njoftuar zyrtarisht për incidentin.