Një studim tronditës i Institutit prestigjioz Robert Koch (RKI), në bashkëpunim me Universitetin e Washingtonit dhe institucione të tjera kërkimore, ka zbuluar përmasat e frikshme të rezistencës ndaj antibiotikëve në Gjermani.
Sipas analizës së publikuar në revistën Journal of Antimicrobial Chemotherapy – Antimicrobial Resistance, vetëm në vitin 2019, rreth 45.700 vdekje në Gjermani kanë qenë të lidhura me patogjenët rezistentë ndaj antibiotikëve.
Në shumë raste, infeksionet e gjakut, të rrugëve të frymëmarrjes apo ato abdominale rezultuan fatale. Vlerësimet tregojnë se 9.600 vdekje mund të ishin shmangur nëse bakteret nuk do të kishin qenë rezistente – që do të thotë se pacientët do të kishin mbijetuar me trajtimin e zakonshëm.
RKI paralajmëron se rezistenca ndaj antibiotikëve është një nga sfidat më të mëdha shëndetësore globale të kohës sonë, e nxitur kryesisht nga përdorimi i tepruar, trajtimet e gjata dhe përshkrimet e gabuara të mjekëve. Ky presion i vazhdueshëm mbi bakteret ka krijuar kushtet ideale që rezistenca të përhapet.
Ekspertët theksojnë se përballja me këtë “armik të heshtur” kërkon strategji të reja, përdorim të kujdesshëm të antibiotikëve dhe rritje të ndërgjegjësimit, përndryshe numri i viktimave do të vijojë të rritet vit pas viti.