Për Yulia Hailunas, një banore e qytetit Dnipro në Ukrainë, pasojat më të rënda të sulmeve ajrore ruse nuk janë ndërprerjet e energjisë elektrike, por temperaturat e ulëta brenda shtëpisë së saj.
Ashtu si mijëra qytetarë të tjerë, ajo ka mbetur pa ngrohje që prej janarit, kur Rusia intensifikoi sulmet ndaj infrastrukturës energjetike të Ukrainës. Në apartamentin e saj, Yulia përpiqet të përballojë të ftohtin duke veshur rroba të trasha, duke ngrohur këmbët me ujë të nxehtë dhe duke kryer ushtrime fizike për të ruajtur temperaturën e trupit. Situata pritet të përkeqësohet, pasi temperaturat parashikohen të zbresin nën -20 gradë Celsius në ditët në vijim.
“Frika më e madhe është se tubat e ngrohjes mund të shpërthejnë dhe nuk do të ketë më mundësi për t’i riparuar. Kjo do të ishte një katastrofë”, shprehet ajo.
Të enjten, presidenti amerikan Donald Trump njoftoi se presidenti rus Vladimir Putin kishte rënë dakord për një ndalim të përkohshëm të sulmeve ndaj qyteteve kryesore të Ukrainës gjatë valës së të ftohtit ekstrem.
Ndërkohë, në Pavlohrad, dhjetëra familje të evakuuara presin ndihmë në qendrat për të zhvendosurit. “Është si të braktisësh një pjesë të vetes”, thotë Kateryna, e cila u largua nga fshati i saj për të mbrojtur dy fëmijët nga bombardimet e vazhdueshme me dronë.
Sistemi energjetik i Ukrainës është sulmuar për të katërtin dimër radhazi, duke u bërë gjithnjë e më i brishtë. Inxhinierët po punojnë pa ndërprerje për të rikthyer furnizimin me energji dhe ngrohje, por besimi i qytetarëve se Rusia do të respektojë ndonjë armëpushim mbetet i ulët.
Ndërsa bisedimet për paqe vijojnë me ndërmjetësimin e Shteteve të Bashkuara, shumë ukrainas shprehen skeptikë.
“Ne duam paqe më shumë se kushdo”, thotë Iryna, një e zhvendosur nga zona e luftës. “Por është e vështirë të besojmë se Rusia nuk do të na tradhtojë sërish.”