Një incident detar ka ndodhur mëngjesin e së enjtes në portin e Igumenicës, ku dy anije janë përplasur rreth orës 10:00.
Anija ECO CATANIA, në pronësi të kompanisë italiane Grimaldi dhe me 34 anëtarë ekuipazhi në bord, u përplas me anijen KYDON PALACE të linjës greke Minoan Lines, e cila ishte e ankoruar dhe kishte në bord 95 anëtarë ekuipazhi.
Si pasojë e përplasjes, anija greke pësoi një çarje të dukshme në trupin e saj, por fatmirësisht nuk raportohet për të lënduar dhe nuk është konstatuar ndotje e mjedisit detar apo hyrje uji në bord.
Autoritetet portuale kanë nisur një hetim paraprak për të zbardhur shkaqet e aksidentit, ndërkohë që të dyja anijet janë urdhëruar të qëndrojnë në port deri në përfundimin e inspektimeve teknike dhe pajisjen me certifikatën përkatëse të lundrimit.