Carlo Ancelotti do të mbyllë aventurën e tij me Real Madridin në fund të këtij sezoni, pavarësisht se kontrata e tij skadon në qershorin e vitit 2026. Lajmi është bërë i ditur nga prestigjiozja The Athletic, që raporton për një marrëveshje mes palëve për ndërprerjen e bashkëpunimit.
Sipas burimit, edhe nëse “Los Blancos” arrijnë të fitojnë La Ligën dhe Kupën e Mbretit, Ancelotti do të largohet nga stoli madrilen.
Trajneri italian nuk pritet të qëndrojë gjatë jashtë fushës, pasi ai është pranë një marrëveshjeje për të marrë drejtimin e përfaqësueses së Brazilit. Pesë herë kampionët e botës kanë synime të mëdha për Botërorin 2026 dhe Ancelotti shihet si njeriu i duhur për t’i udhëhequr drejt suksesit.
Ndërkohë, Real Madrid ka piketuar pasardhësin e tij: Xabi Alonso. Ish-mesfushori i njohur pritet të largohet nga Bayer Leverkusen në fund të sezonit dhe të rikthehet në “Santiago Bernabéu”, këtë herë në rolin e trajnerit.