Një tjetër alarm për sigurinë ushqimore është ngritur në Shqipëri. Sistemi Evropian i Njoftimit të Shpejtë për Ushqimin (RASFF) ka raportuar më 10 prill se në tregun shqiptar është shitur sheqer palmë me nivel të lartë të dioksidit të squfurit, një alergen mbi kufirin e lejuar.
Bëhet fjalë për produktin “Palmsugar slices TD bg 200g”, i prodhuar në Tajlandë, dhe i importuar nga Holanda në Shqipëri më 22 dhjetor 2024, në një sasi prej 24 kg.
Autoriteti Kombëtar i Ushqimit (AKU), pas verifikimeve në terren, konfirmoi se produkti është shpërndarë dhe aktualisht nuk gjendet më në stok. Megjithatë, konsumatorët që mund ta kenë blerë duhet të tregohen të kujdesshëm.
AKU ka njoftuar zyrtarisht përmes RASFF dhe vijon ndjekjen e rastit për siguri të mëtejshme.
“Me marrjen e njoftimit nga sistemi RASFF me datë 10.04.2025, AKU ka kryer verifikimet në terren, nga ku ka rezultuar se produkti me origjinë nga Tajlanda, është importuar nga Holanda me datë 22.12.2024 në sasinë 24kg. Nga verifikimi i gjurmueshmërisë rezulton se subjekti nuk e kishte gjendje këtë produkt. AKU ka bërë njoftimin përkatës pranë kategorisë së Njoftimeve RASFF”, thuhet në njoftimin e publikuar në faqen zyrtare nga AKU.