Fluturimet në Aeroportin Ndërkombëtar të Berlin Brandenburg janë pezulluar për gati dy orë mbrëmjen e sotme, pas raportimeve për dronë të paidentifikuar në hapësirën ajrore të aeroportit — një incident që shton serinë e alarmeve të ngjashme në disa aeroporte evropiane javët e fundit.
Sipas një zëdhënësi të aeroportit, ngritjet dhe uljet u ndërprenë nga ora 20:08 deri në 21:58, për shkak të shqetësimeve për sigurinë e trafikut ajror. Gjatë kësaj kohe, një numër i konsiderueshëm fluturimesh u detyruan të devijohen drejt qyteteve të tjera gjermane, ndërsa disa të tjerë pësuan vonesa të gjata në pistë.
Autoritetet gjermane nuk kanë dhënë ende detaje mbi identitetin apo qëllimin e dronëve, por kanë nisur një hetim zyrtar në bashkëpunim me policinë federale dhe autoritetin e aviacionit civil.
Incidenti në Berlin ndodh pas një sërë ndërprerjesh të ngjashme në Londër, Stokholm dhe Varshavë, që kanë nxitur shqetësime për sigurinë ajrore në Evropë dhe nevojën për masa më të rrepta kundër përdorimit të pajisjeve ajrore pa pilot pranë aeroporteve.