Reshjet e dendura të shiut që vijojnë në kryeqytet kanë rritur ndjeshëm nivelin e lumit Lana në segmentin pranë Pallatit me Shigjeta, një nga zonat më delikate të qytetit.
Ekipet e bashkisë nën drejtimin e nënkryetarit Ilir Mëngra, së bashku me kreun e grupit parlamentar të Partisë Socialiste, Taulant Balla, ndodhen në terren për monitorimin e situatës dhe parandalimin e rreziqeve. Aktualisht, ujërat kanë arritur deri në pjesën e lulishtes, dhe ekziston rreziku që të dalin edhe në rrugë nëse reshjet vijojnë.
Autoritetet bëjnë thirrje për kujdes dhe u sugjerojnë qytetarëve të ndjekin vetëm informacionet zyrtare. Pavarësisht rritjes së nivelit të ujit, deri tani nuk ka raportime për përmbytje, dëme materiale apo bllokime të qarkullimit.