Një fenomen i pazakontë ka detyruar ndalimin e plotë të prodhimit në centralin bërthamor të Gravelines, në veri të Francës, pasi një tufë masive kandilësh deti bllokoi filtrat e ujit ftohës.
Sipas operatorit shtetëror EDF, incidenti ndodhi mbrëmjen e së dielës, kur filtrat e pompimit që furnizojnë centralin me ujë të ftohtë nga kanali i lidhur me Detin e Veriut u mbushën plot me kandilë.
Reaktorët 2, 3 dhe 4 u ndalën automatikisht, ndërsa pak më vonë u fik edhe reaktori 6. Dy reaktorë të tjerë janë tashmë jashtë shërbimi për mirëmbajtje të planifikuar.
Centrali, i pozicionuar mes Calais dhe Dunkirk, është një hallkë kyçe në prodhimin e energjisë së Francës. Autoritetet siguruan se ngjarja nuk ka ndikuar në sigurinë e pajisjeve, stafit apo mjedisit.
Ekspertët thonë se kandilët janë të zakonshëm në Detin e Veriut gjatë verës, por një tufë aq e madhe që të ndalojë një central bërthamor është një dukuri jashtëzakonisht e rrallë dhe e paparashikueshme.