Një valë e re moti i keq pritet të godasë Shqipërinë në ditët e para të tetorit, me rënie të ndjeshme të temperaturave, reshje intensive shiu dhe stuhi. Paralajmërimin e jep meteorologu grek dhe eurodeputeti i Pasok-ut, Sakis Arnaoutoglou, i cili shpesh informon publikun për fenomenet e rrezikshme atmosferike që prekin vendin tonë.
Sipas parashikimeve, e enjtja, 2 tetor, do të sjellë reshje intensive shiu dhe dëbore në shumë zona të vendit:
Veriu (Shkodër, Kukës, Peshkopi): reshje shumë të forta shiu; dëbore mbi 900–1000 metra lartësi me shtresim të konsiderueshëm.
Qendra (Dibër, Burrel, Elbasan; male Korab dhe Shebenik): reshje bollshme shiu dhe dëbore mbi 1000 metra, më intensive në lartësi të mëdha.
Juglindja (Gramsh, Korçë; male Moravë dhe Gramoz): reshje të dendura shiu dhe dëborë mbi 1200 metra.
Jugu (Gjirokastër, Tepelenë, Përmet): kryesisht reshje shiu, me mundësi reshjesh bore mbi 1200–1300 metra.
Bregdeti perëndimor (Tiranë, Durrës, Vlorë): reshje të pakta dhe të dobëta, disa zona mund të mbeten pa reshje.
Lëvizja me automjete në zona malore do të jetë e vështirë: zinxhirët do të jenë të nevojshëm në rrugën Shkodër–Kukës, segmentin malor Burrel–Peshkopi mbi 900–1000 metra, rrugën Elbasan–Librazhd drejt Maqedonisë së Veriut mbi 1000 metra, si dhe disa kalime malore drejt Korçës, Gjirokastrës dhe Përmetit mbi 1300–1400 metra.
Era do të fryjë fort përgjatë vijës bregdetare nga Vlora deri në Shkodër, me shpejtësi 60–80 km/h, përkatësisht forcë 8 në shkallën Beaufort, ndërsa në brendësi të vendit nuk pritet të kalojë forcën 5–6 Beaufort.
Publiku paralajmërohet të marrë masat e nevojshme për sigurinë dhe të ndjekë informacionet zyrtare mbi gjendjen e motit.